Një akullnajë e madhe në Alpet Zvicerane është shkëputur nga malet të mërkurën, duke shkaktuar një ortek të madh akulli, balte dhe materiali shkëmbor që është rrokullisur teposhtë një fshati malor. Banorët ishin evakuuar për shkak të paralajmërimit të autoriteteve për rrëshqitje shkëmbore – kanë thënë autoritetet vendase – raporton Reuters.
Zyrtarët kanë thënë se një person konsiderohet i zhdukur.Pamjet nga droni në televizionin publik zviceran SRF kanë treguar sesi një sasi e madhe dheu ka mbuluar krejtësisht pjesën veriperëndimore të fshatit Blatten, bashkë me lumin që e përshkon dhe brigjet e tij të luginës përreth.“Kemi humbur fshatin tonë.” – ka thënë Matthias Bellwald, Kryetar i Blattenit në një Konferencë për media pas rrëshqitjes së akullnajës.
“Fshati është poshtë rrënojave. Ne do ta rindërtojmë.”Stephane Ganzer, zyrtar në kantonin Valais ku ndodhet Blatteni, ka deklaruar për mediat zvicerane se rreth 90% e fshatit është mbuluar nga materiali që ka sjellë orteku.“Një sasi e pabesueshme e materialit që ka rënë në luginë.” – ka thënë Matthias Ebener, zëdhënës i autoriteteve lokale. Ai ka thënë se një person konsiderohet i zhdukur.
Zyrtarët kanë thënë se miliona metra kube materiali shkëmbor dhe dheu kanë fundosur fshatin. Zyrtarët kishin strehuar banorët e fshatit në fillim të muajit pas shenjave se një pjesë e malit prapa akullnajës kishte nisur të shkërmoqej.
