Të dielën në Kosovë pritet të kemi rikthimin e fuqishëm të kushteve dimërore. Priten vranësira të dendura të cilat në fillim do të kushtëzojnë reshje shiu. Reshjet e shiut shumë shpejt do të shndërrohen në borë fillimisht në viset kodrinore-malore, pastaj edhe në viset e ulëta. Reshje bore priten në gati të gjithë territorin e Republikës së Kosovës. Pasdite vonë ose në mbrëmje reshjet pushojnë dhe pasojnë kthjellime të pjesshme. Temperaturat do të shënojnë ulje të ndjeshme që nga mëngjesi, por edhe më të theksuara në orët e mbrëmjes kur pritet të “zhyten” në “minus”.
Në Shqipëri, Maqedoninë Veriore, Luginë të Preshevës dhe Mal të Zi të dielën pritet të ketë shtim masiv të vranësirave me reshje e rrebeshe shiu në zonat mesdhetare, ndërsa reshje shqote e bore në gati të gjitha viset kontinentale. Fronti i ftohtë do të rrugëtojë fuqishëm nga veriu në drejtim të jugut duke sjellur ulje të temperaturave në të gjithë rajonin me kushte dimërore në viset kontinentale.
Nga e Hëna na pret mot me intervale kohore me diell, por edhe vranësira të shpeshta e ndonjë rrebesh lokal bore. Erërat e ftohta veriore do të shoqërohen nganjëherë në disa rajone me fjolla bore. Gjatë natës dhe mëngjeseve të hershme kthjellim i pjesshëm i motit dhe acar sidomos në viset kontinentale ku ka kthjellime.
Nga e Enjta zbutje e acarit dhe rritje graduale e temperaturave./MeteoBallkan
