Siç kemi paralajmëruar edhe në disa postime paraprake, goditja dimërore do të pasojë nga e diela apo e hëna, dhe kjo mund të jetë goditja më e fuqishme për këtë dimër në Gadishullin Ballkanik.
Vlen të theksohet se kjo masë e fuqishme e ftohtë ajrore do të shkaktojë përkeqësim të fuqishëm të motit në pothuajse tërë Gadishullin Ballkanik, megjithatë sa iu përket reshjeve atmosferike duhet të jemi të kujdesshëm sepse modelet në çdo përditësim të tyre ndryshojnë sasinë dhe vendin se ku do të bien reshjet më të mëdha.
Me siguri se do të kemi reshje dëbore në Kosovë, shumë pjesë të Shqipërisë dhe Maqedonisë së Veriut, por për detaje precize duhet të presim ende.
Deri në këtë moment është e sigurte se do të kemi ulje drastike të temperaturave, erëra të ftohta veriore dhe verilindore si dhe reshje lokale shiu të cilat shumë shpejtë do të shndërrohen në reshje dëbore. Erërat e ftohta verilindore do të jenë të fuqishme herë pas here dhe do të arrijnë shpejtësinë maksimale nga 30 deri në 50 km/h, varësisht nga rajoni në rajon.
Temperaturat minimale nëpër ultësira pritet të sillen nga 0 deri në -5 gradë Celsius, kurse në viset më të larta malore ato mund të ulen deri në -10 gradë Celsius.
Informacione dhe detaje tjera në postimet tona të ardhshme./Meteoballkan
