Përmbytjet dhe rrëshqitjet e dheut kanë vazhduar të bëjnë kërdi në Azinë Jugore të martën, me numrin e të vdekurve që ka arritur deri në 78 në Nepal dhe autoritetet në Indinë verilindore fqinjë po luftojnë për të siguruar ndihmë për mbi 4 milionë njerëz në shtetin e Assam, thanë zyrtarët.
Qendra Kombëtare e Operacionit të Emergjencave të Nepalit tha se më shumë se 40,000 ushtarë dhe policë po përdorin edhe helikopterë për të shpërndarë ushqim në tokë. Ekipet e shpëtimit gjithashtu po kërkonin për 32 njerëz të zhdukur.
Në Assam, zyrtarët thanë se përmbytjet kanë vrarë të paktën 19 njerëz dhe kanë afektuar për rreth 4.5 milionë.
Si pasojë e përmbytjeve dhe rrëshqitjeve të tokës në Nepal, tre lumenj kanë dalë nga shtrati në Indi dhe kanë zhytur pjesë të shtetit lindor Bihar, duke vrarë të paktën 24 vetë, tha Pratata Amrit, një zyrtar i qeverisë shtetërore.
Më shumë se 2.5 milion njerëz janë goditur nga përmbytjet në 12 nga 38 rrethe të shtetit të Bihar, tha Amrit.
Në Bangladesh, poashtu të përfshirë nga përmbytjet katastrofike dhe reshjet e rrëmbyeshme raportohet se shumë fermerë, janë vrarë nga rrufeja që nga e shtuna pasi shirat e monsunike goditën pjesë të vendit.
Bangladeshi, me 160 milionë banorë dhe më shumë se 130 lumenj, është i rrezikuar nga përmbytjet monsunike për shkak të lumenjve të tejmbushur dhe rrymës së ujit nga India në rrjedhën e sipërme.
