Pas kalimit të një mase ajrore ciklonike e cila gjatë ditës së djeshme solli reshje shiu, diku të dendura e diku simbolike, sot moti është stabilizuar, por masa të reja ciklonike nga Mesdheu po i afrohen Shqipërisë, Kosovës, Maqedoninë Veriore etj.
Në këto çaste kemi intervale kohore me diell në Kosovë, ndërsa në Shqipëri kemi më shumë vranësira dhe në disa vise edhe riga lokale shiu. Gjatë natës reshjet do të përfshijnë fillimisht territorin e Shqipërisë, pastaj edhe Maqedoninë Veriore dhe Kosovën. Në jug, jugperëndim sidomos, por edhe në pjesët tjera të bregdetit shqiptar herë pas here priten rrebeshe intensive shiu me vetëtima dhe bubullimë. Në viset tjera gjatë ditës së nesërme priten reshje të zakonshme shiu nëse mund ti quajmë të tilla. Reshje bore priten vetëm në viset më të larta malore.
Mungesa e reshjeve të borës edhe këtë Dhjetor është më se evidente për shkak të masave të ngrohta ajrore nga Mesdheu dhe dominimi i fuqishëm i Atlantikut dhe kjo gjendje zhgënjyese për entuziastët e borës do të vazhdojë edhe gjatë mesit të Dhjetorit, përpos kësaj fundjave kur do të kemi disa gjasa për reshje bore në disa rajone në Kosovë. Edhe nëse do kemi reshje bore ato nuk do të jenë të qëndrueshme./Meteoballkan
