Reshjet e borës kohëve të fundit janë bërë dukuri gjithnjë e më e rrallë sidomos nëpër viset më të ulëta, por edhe në ato mesatare. Edhe pse po kalon dhjetëditëshi i parë i Dhjetorit borë ka pasur vetëm në zonat malore dhe rrallë në disa zona më të ulëta dhe kjo po vazhdon Dhjetorëve të fundit sikur është bërë trend.
Megjithatë, gjatë kësaj fundjave do të kemi fuqizim të masave ajrore ciklonike, por disa ditë do të jemi nën ndikimin e rrymimeve ajrore nga jugu që dmth. rrymime të ngrohta ajrore që sjellin vetëm reshje shiu e borë vetëm në zonat e larta malore. Gjatë fundjavës do të kemi reshje të dendura shiu sidomos në Shqipëri, por edhe në disa vise të Kosovës.
Me fillimin e javës së re do të kemi ndryshim të rrymimeve ajrore, pasiqë cikloni i fuqishëm do të kalojë në lindje të Kontinentit duke kushtëzuar ndryshimin e rrymimeve ajrore në vendin tonë. Me kalimin e ciklonit drejt lindjes në vendin tonë do të fillojnë të fryjnë erëra nga veriu dhe kjo nënkupton ulje e temperaturave dhe nëse ka lagështi në atmosferë edhe reshje bore.
Sipas ecurive aktuale sinoptike të hënën në shumë pjesë të Kosovës do të kemi reshje bore, madje vende-vende priten reshje të dendura bore dhe mund të kemi shtresat e e para të borës nëpër disa zona më të ulëta mbidetare, por edhe kësaj radhe reshjet e borës nuk pritet të jenë shumë të qëndrueshme.
Deri në fillim të javës së re do të ketë kohë për ndryshime eventuale, por gjasat janë pothuajse shumë të forta që të hënën të kemi reshje bore në Kosovë.
Për çdo ndryshim eventual do të lajmëroheni me kohë në postimet tona të përditshme./MeteoBallkan
