Një ciklon mjaft i fuqishëm sonte do të përfshijë rajonin tonë duke kaluar me qendrën e tij pikërisht mbi territorin e Kosovës, Shqipërisë dhe Maqedonisë së Veriut. Së pari të sqarohemi (për tu ikur keqkuptimeve ose panikut sipas disave që kanë fobi) se nuk po ndodh diçka e jashtëzakonshme, ekstreme apo e rrezikshme, por kjo është mjaft interesante në aspektin meteorologjik, megjithatë në disa rajone të Shqipërisë nuk duhet përjashtuar edhe mundësinë e paraqitjes së problemeve për shkak të reshjeve të rrëmbyeshme, erërave-shtrëngatave dhe shkarkimeve të fuqishme atmosferike.
Sidoqoftë, sot pasdite dhe në mbrëmje fillimisht në Shqipëri priten vranësira të dendura të cilat do të kushtëzojnë rrebeshe të fuqishme shiu me vetëtima dhe bubullimë. Reshje intensive do të ketë anekënd territorit të Shqipërisë, por më të dendurat pritet të jenë në jug dhe jugperëndim të vendit.
Pasditen e vonshme dhe në mbrëmje reshje të dendura shiu do të përfshijnë edhe territorin e Republikës së Kosovës. Ka mundësi që vende-vende të ketë edhe rrebeshe intensive shiu me vetëtima dhe bubullimë, por krahasuar me Shqipërinë dhe Maqedoninë Veriore reshjet në Kosovë pritet të jenë më të pakta, pa përjashtuar mundësinë e vërshimeve të shpejta dhe problemeve afatshkurtra.
Gjatë orëve të hershme të mëngjesin në viset malore mbi 1200 deri 1400 m. lartësi mbidetare mund të ketë edhe reshje bore, përndryshe në vendet fqinje si në Mal të Zi, Serbi dhe Bosnjë bora mund të zbres deri në 800 apo 600 metra lartësi mbidetare.
Cikloni dhe ulja e temperaturave do të jenë kalimtare, sepse nga e mërkura do të jetë më nxehtë, por masa të reja ajrore ciklonike me reshje të herëpashershme shiu priten nga e enjta./Meteoballkan
Main Image By: Windy
