Ministria e Ekonomisë ka bërë të ditur të mërkurën mbrëma, se ka mbyllur përkohësisht thirrjen publike për aplikim për Subvencionim të Efiçiencës së Energjisë për qytetarët.
Sipas njoftimit, thirrja është mbyllur për shkak se numri i aplikuesve ka shteruar buxhetin e paraparë për këtë thirrje.
“Thirrja Publike për Subvencionim të Efiçiencës së Energjisë për qytetarët, e hapur me datën 06.10.2022 sot është mbyllur përkohësisht për aplikim pasi që numri i aplikimeve ka shteruar buxhetin e paraparë për këtë thirrje. Ky kalkulim është bërë duke u bazuar në kriterin që secili subvencion do të jetë me çmimin maksimal të lejuar, ndërsa thirrja do të rihapet me mjetet e mbetura pasi të shqyrtohen aplikimet e para nga Komisioni Vlerësues për shqyrtimin e aplikacioneve për subvencionim”, thuhet në njoftim.
Ministria ka njoftuar se numri total i aplikuesve për fazën e parë është 5.992, ndërkaq kostoja e arritur nga aplikimet është mbi 6 milionë euro, sa ishte paraparë për fazën e parë.
“Pompë Termike 1.313 aplikues, Inverter 2.656 aplikues, Kalda me Biomasë 816 aplikues dhe Stufa me biomasë 1.207 aplikues. Numri i aplikuesve të cilët janë në kategorinë e mbështetjes së skemës të asistencës social është 275. Theksojmë se deri më tani numri total i aplikuesve për fazën e dytë është 218. Ndërsa shifra e arritur nga aplikimet është 6,000,020.00 euro”, thuhet në njoftim.
