Pluhuri i shkretëtirës së Saharës, i ardhur drejt Italisë nga erërat që vijnë nga Afrika e Veriut, ka arritur në Lombardi dhe Milano ditën e shtunë, më 30 mars. Në imazhet e kapura nga Sesto San Giovanni, horizonti i qytetit është i zbehur nga një lloj pluhuri i verdhë.
Po ashtu ditën e djeshme, një erë e fortë jugore kishte bartur rërë nga Sahara nga Afrika veriore në Zvicër.
Saharaja është burimi më i madh i pluhurit mineral, që çliron nga 60 deri në 200 milionë ton në vit, dhe ndërsa grimcat më të mëdha bien shpejt në tokë, ato më të voglat mund të transportohen mijëra kilometra dhe të arrijnë nëpër Evropë.
Franca juglindore është vënë gjithashtu në alarm për shkak të rërës nga Saharaja dhe përqendrimeve të grimcave të imta.
