Kompania Rajonale e Ujësjellësit ka dalë me një njoftim pas reshjeve të mëdha të shiut.
KRU Prishtina thotë se linjat e Kanalizimit ( ujërat fekale) në qytetin e Prishtinës janë në gjysmën e tyre linja të vjetra, të cilat janë dimensionuar dhe vendosur shumë kohë më përpara.
KRU Prishtina thotë se përgjatë reshjeve të dendura, ndalohet rreptësisht hapja e pusetave të kanalizimit në mënyrë që ujërat e shiut të depërtojnë brenda në kanalizim, me çrast uji mund të depërtojë në shtëpitë tuaja.
Ju duket ndihmesë, por kjo shkakton dëme në banimet tuaja.
Njoftimi i plotë:
Linjat e Kanalizimit ( ujërat fekale) në qytetin e Prishtinës janë në gjysmën e tyre linja të vjetra, të cilat janë dimensionuar dhe vendosur shumë kohë më përpara. Sistemet e kanalizimeve janë të përbashkëta ( Atmosferike dhe Fekale) dhe kjo e rëndon dukshëm gjendjen e funksionimit në rastet kur ka reshje të vrullshme apo të shumta shiu. Përderisa qyteti i Prishtinës pothuajse në çdo lagje ka pësuar ndryshime në ndërtime te larta – objekte banesore – rritje e tejskajshme e numrit të banorëve, aty ku janë të përbashkëta, duhet ndarë. Ujësjellësi i Prishtinës ka një buxhet të paraparë për investime ( riparim , puseta , debllokime ) në këtë sektor, gjithsesi ka edhe ekipet profesionale që merren me mirëmbajtjen e sistemeve të kanalizimeve të ujërave të ndotura fekale por assesi nuk mirëmbanë as nuk ndërton rrjeta të kanalizimeve atmosferike pasi që kjo nuk është në kompetencën tonë. Me Komunën e Prishtinës jemi në kontakte rreth këtyre çështjeve, konkretisht me drejtorinë për Investime Kapitale, ku në disa raste janë bashkërenduar veprimet për zgjidhje të disa rasteve më problematike.
Ekipet e mirëmbajtjes së rrjetit të kanalizimit të KRU,,Prishtina,, sh.a. janë të gatshëm çdoherë që tu dalin në ndihmë qytetarëve në rastet kur kemi të bëjmë me debllokime të pusetave të ujërave fekale, por duhet të kihet parasysh që vërshimet pas reshjeve nuk ndodhin për shkak të punës dhe përgjegjësisë tonë!
P.S 🛑 Kujdes! Përgjatë reshjeve të dendura, ndalohet rreptësisht hapja e pusetave të kanalizimit në mënyrë që ujërat e shiut të depërtojnë brenda në kanalizim, me çrast uji mund të depërtojë në shtëpitë tuaja.
Ju duket ndihmesë, por kjo shkakton dëme në banimet tuaja.
