Më shumë se 600 njerëz janë vrarë dhe qindra të tjerë janë plagosur pas një tërmeti të fuqishëm që goditi Marokun.
Pamjet e shpërndara në internet treguan njerëzit duke bërtitur ndërsa iknin nga ndërtesat që po shembeshin, me një re të madhe pluhuri që ngrihej në Marakesh – një vend i Trashëgimisë Botërore të UNESCO-s.
Skenat me shkatërrime tregonin gjithashtu banorët që u bashkuan për të shpëtuar të bllokuarit në rrënoja, ndërkohë që turma të mëdha u mblodhën në zona të hapura në të gjithë qytetin për të kaluar natën.
Numri i të vdekurve i tejkaloi 632 në orët e para të së shtunës, ndërsa 329 të plagosur u dërguan në spitale për trajtim, njoftoi TV shtetëror.
Shërbimi Gjeologjik i SHBA-së (USGS) tha se tërmeti kishte një magnitudë paraprake prej 6.8 ballë kur ra në orën 23:11 me orën lokale, me lëkundje që zgjati disa sekonda.
Rrjeti Kombëtar i Monitorimit Sizmik dhe Alert i Marokut e mati atë në 7 të shkallës Rihter.
Epiqendra e tërmetit goditi afër qytetit Ighil, afërsisht 70 kilometra në jug të Marrakesh.
Rrugët pranë epiqendrës së tërmetit u bllokuan nga automjetet e zëna nga gurët e shembur, njoftuan mediat lokale.
USGS tha se epiqendra ishte 18 kilometra (11 milje) nën sipërfaqen e Tokës, ndërsa agjencia sizmike e Marokut e caktoi në 8 kilometra thellësi. Në secilin rast, tërmete të tilla të cekëta janë më të rrezikshme.
Në vend që të ktheheshin në ndërtesat e betonit, burra, gra dhe fëmijë qëndruan në rrugë të shqetësuar për pasgoditjet që mund të bënin që shtëpitë e tyre të lëkundeshin.
Agjencia amerikane raportoi një pasgoditje me magnitudë 4.9 ballë që goditi 19 minuta më vonë.
Megjithëse tërmetet janë relativisht të rrallë në Afrikën e Veriut, një lëkundje me magnitudë 5.8 e cila goditi afër Agadir në vitin 1960 shkaktoi mijëra të vdekur.
Kreu i Monitorimit dhe Paralajmërimit Sizmik i Institutit Kombëtar të Gjeofizikës, Lahcen Mhanni, tha për 2M TV se tërmeti ishte “i jashtëzakonshëm”.
Ai tha: “Rajonet malore në përgjithësi nuk prodhojnë tërmete të këtyre përmasave.” Është tërmeti më i fortë i regjistruar në rajon.
