Mbi rajonin tonë nga sot e tutje reshjet do të largohen gradualisht. Ka mundësi që të ketë vetëm riga apo ndonjë rrebesh të izoluar shiu, por ende jemi nën ndikimin e masave ajrore që vijnë nga veriu i kontinentit. Edhe nesër do të kemi mot të ngjashëm sikurse sot, por pak më nxehtë. Nga e diela pritet stabilizim i motit dhe ngritje e mëtutjeshme e temperaturave. Fillimi i javës së ardhshme do të karakterizohet me aktivizimin e masave ajrore nga Afrika Veriore të cilat kësaj radhe vijnë si pasojë e presionit të ulët atmosferik së bashku me reshje atmosferike.
Cikloni me qendër në Afrikën Veriore do të jetë përgjegjës edhe për depërtimin e pluhurit Saharian mbi rajonin tonë javën e ardhshme. Natën mes së hënës dhe së martës priten reshje apo rrebeshe lokale shiu me vetëtima dhe bubullimë. Këto reshje mund të jenë të përziera me rërën apo pluhurin Saharian. Pas kalimit të reshjeve do të vazhdojë ndikimi i Afrikës Veriore duke u ngritur temperaturat dhe pjesërisht pritet edhe stabilizim i motit. Pra na pret një pranverë e vërtetë dhe në disa rajone priten edhe temperatura verore. Nuk do të mungojnë erërat të cilat herë pas here do të jenë të fuqishme jugore./Meteoballkan