Shkencëtarët federalë amerikanë kanë paralajmëruar të enjten se ka 75% gjasa që viti 2020 të jetë më i nxehti në historinë meteorologjike të planetit Tokë.
Tashmë, tre muajt e parë të vitit, janë në vendin e dytë, pas nxehtësisë së vitit 2016, që ishte shkaktuar nga fenomeni El Nino. Kështu ka thënë Administrata Atmosferike dhe Oqeanike Kombëtare (NOAA), sjell në shqip MeteoBallkan.
Sipas Deke Arndt nga NOAA, ngrohtësia e këtij viti është e pazakontë, duke e pasur parasysh mungesën e ashpërsisë së El Nino-s, një ngrohtësi natyrale nga ujërat tropikale të Oqeanit Pacifik që influencon temperaturat në tërë botën.
Edhe nëse 2020-a përfundon duke mos qenë viti më i nxehtë, NOAA ka paralajmëruar se ka 99.9% gjasa që 2020-a të jetë ndër pesë vitet që shënojnë rekordin për nxehtësinë më të madhe në histori.
Gjatë muajve të parë të këtij viti, nxehtësia ka qenë globale.
“Temperatura rekord nga janari deri në mars janë regjistruar në pjesët më të mëdha të Evropës, Azisë, Amerikës Qendrore dhe Jugore, e po ashtu edhe në Atlantik dhe në Oqeanin Indian dhe në pjesën perëndimore të Oqeanit Pacifik”, thuhet nga NOAA.
“Nuk ka ndonjë vend në Tokë ku është regjistruar rekord i temperaturave të ftohta në këtë periudhë”, thuhet në fund. /MeteoBallkan/
Burimi: 2020 expected to be Earth’s warmest year on record, scientists say
