Fillimi i javës së re do të na gjejë me temperatura relativisht të larta, por të cilat do të zgjasin shumë shkurt. Menjëherë pasditën e sotme priten reshje shiu, vende -vende edhe bore si dhe gjatë mbrëmjes dhe natës ulje e theksuar e temperaturave. Ditën e Martë dhe të Mërkurë do të jetë mjaft ftohtë, me reshje të dobëta të rralla bore dhe me erëra mesatare por të ftohta veriore.
Nga dita e Enjte mund të kemi ngritje të lehta të temperaturave, sepse do të jemi nën ndikimin e anticiklonit të fuqishëm me qendër në Evropën Perëndimore, kurse nga lindja do të kemi tentime për depërtimin e masave ajrore të ftohta. Gjatë mesjavës do të kemi mot tipik të Dhjetorit, pra do të jetë thatë, me netë të ftohta dhe me mundësi për mjegull nëpër lugina, kurse ditët do të jenë brenda suazave normale për këtë periudhë kohore. Edhe në fundjavë nuk parashihet ndonjë ndryshim i madh i motit përpos se do të kemi dobësimin e anticiklonit Evropian, gjegjësisht largimin e tij në drejtim të Oqeanit Atlantik. Kjo do të bëjë të mundur fillimin e depërtimit të masave ajrore më të ftohta nga lindja e Kontinentit.
Sidoqoftë modelet janë mjaft të ndërlikuara për atë periudhë kohore për shkak të ngrohjes së Stratosferës, por gjërat do të vijnë duke u sqaruar me kalimin e kohës dhe për çdo ndryshim eventual do tju njoftojmë me kohë në Meteoballkan.com.
Pra, shikuar në përgjithësi na pret një javë, në suaza të normalës për fundin e Dhjetorit, fillimisht shi pastaj erëra dhe vende – vende bore, pastaj ulje e theksuar, por jo ekstreme e temperaturave, kurse më tutje ngritje e vogël e temperaturave me mundësi që në fundjavë ato të ulën përsëri dhe të shoqërohen me reshje bore./Meteoballkan.
