Masa ajrore anticiklonike gjatë ditës së sotme na dhuroi mot mjaft të këndshëm pranveror, ndërsa temperaturat më në fund shënuan rritje.
Anticikloni do të dobësohet menjëherë nesër dhe në rajonin tonë do të depërtojë një masë ajrore pak më jo-stabile që vjen nga Gjermania. Sidoqoftë, temperaturat nuk do të shënojnë ulje dhe priten intervale kohore me mot të mirë, megjithatë priten edhe vranësira dhe vende-vende pasdite dhe në mbrëmje riga dhe rrebeshe lokale shiu kryesisht në territorin e Kosovës.
Gjatë ditëve të ardhshme një masë ajrore ciklonike do të formohet mbi Itali dhe kjo do të ndikojë herë pas here në kushtet e motit në rajonin tonë duke sjellur vranësira dhe nganjëherë reshje lokale shiu.
Pra, para nesh një periudhë me mot tipik pranveror, me intervale kohore me diell, vranësira të herëpashershme dhe riga dhe rrebeshe lokale shiu po ashtu herë pas here.
Sipas ecurive aktuale sinoptike dita e Një Majit do të jetë e ngrohtë, por me vranësira të herëpashershme dhe në Kosovë kryesisht pa reshje ose me reshje të pakta lokale. Në Shqipëri lokalisht priten reshje të herëpashershme shiu, por ky parashikim ende mund të ndryshojë për shkak të qarkullimit të ciklonit mbi Itali.
Pas një periudhe disaditore me mot mjaft të ftohtë temperaturat po shënojnë rritje por nuk kemi stabilizim të motit për një afat të gjatë, ndërkaq në mesin e javes tjetër mund të kemi ulje të sërishme të temperaturave.
Informacione tjera në postimet tona të ardhshme./METEOBALLKAN
