Stuhi mjaft të fuqishme shiu me vetëtima, bubullimë dhe breshër pritet të përfshijnë sot përsëri rajonet që nga Bosnja dhe Hercegovina, përmes Serbisë e sidomos në Bullgari dhe jug të Rumanisë ku priten shtrëngatat më të forta me potencial për breshër masiv dhe tornado. Të Premten rrezikohet dukshëm edhe bregdeti bullgar në Detin e Zi, kurse atmosfera më aktive në viset tona do të jetë sonte gjatë natës dhe gjatë agimit të së Premtes.
Pas një periudhe të gjatë të ditëve me vapë të fortë verore temperaturat do të shënojnë ulje edhe në viset tona gjatë së Premtes.
Stuhitë e fuqishme që kapen Evropen qendrore dhe shumë pjesë të Ballkanit fatmirësisht nuk depërtuan në viset tona, megjithatë tani ato do të arrijnë edhe pse jo me ndonjë rrezikshmëri shumë të lartë. Sidoqoftë disa vise të Republikës së Kosovë mund të kenë ndonjë shtrëngatë të fuqishme me rrebeshe intensive shiu me vetëtima dhe bubullimë gjatë natës dhe mëngjesit të hershëm të së premtes.
Theksojmë edhe një herë se energjia më e madhe e këtyre stuhive do të jetë që nga Bosnja dhe Hercegovina, Serbia e sidomos në Bullgari dhe jug të Rumanisë dhe këtë e konfirmon edhe parashikimi më i ri i Institutit evropian për vëzhgimin e stuhive verore Estofex duke nënvizuar territorin bullgar me numrin 3 për rrezikshmëri ekstreme. Nuk duhet nënvlerësuar asesi edhe numri 2 ku janë të përfshira edhe disa pjesë të Republikës së Kosovës.
Frontet e shtrëngatave do të kalojnë viset tona dhe nga e Premta pasdite do të pasojë stabilizimi i motit, kurse ato vazhdojnë me potencë në Bullgari edhe gjatë pasdites dhe mbrëmjes së të Premtes.
