Siç po shihet edhe në imazhin satelitor sot po mban mot tërësisht i kthjellët mbi rajonin tonë dhe me vranësira shumë të pakta në ndonjë vend.
Gjithashtu jemi nën ndikimin e masës së nxehtë ajrore dhe temperaturat janë mjaft të larta. Masa ajrore e thatë anticiklonike na siguron mot të thatë dhe pa reshje atmosferike.
Megjithatë, nesër në disa rajone do të ketë ndryshim të motit sepse do të kemi depërtimin e një mase jostabile ajrore mbi rajonin tonë, masë kjo e cila do të shkaktojë destabilizim të pjesshëm të motit sidomos në disa pjesë të Kosovës ku priten zhvillime të vranësirave vertikale të cilat do të kushtëzojnë rrebeshe të izoluara shiu me vetëtima dhe bubullimë. Në ato lokacione ku rrebeshet e shiut do të jenë prezente mund të ketë edhe breshër.
Pra, kemi hyrë në sezonën e nxehtë ku reshjet janë shpeshherë mjaft të lokalizuara apo të izoluara. Në një rajon mund të bie shumë, kurse në rajonin tjetër afër mund të mos ketë asnjë pikë shiu dhe pikërisht kjo do të ndodhë ditëve të ardhshme./Meteoballkan
