Krahasuar me territorin masiv të Evropes mund të themi se sot duket pak më qetë, megjithatë në shumë zona edhe sot po ndodhin stuhi të fuqishme të izoluara me bubullima dhe breshër që nga Spanja verilindore, Franca dhe stuhitë pritet të intensifikohen në rajonet Alpine në krahun verior.
Stuhi të izoluara sot priten në disa vise alpine të Gjermanisë dhe Austrisë, pastaj edhe në Italinë veriore dhe zonat përreth. Shtrëngatat më të fuqishme me breshër sot priten në verilindje të Spanjes dhe shumë pjesë të Francës.
Pak më ndryshe parashihet të jetë dita e Premte me stuhi dhe shtrëngatat të fuqishme dhe shumë më të përhapura që nga Franca e sidomos në Gjermani, Zvicër, Austri, Çeki, Sllovaki, Poloni etj.
Stuhitë ende nuk do të kapin territorin e Ballkanit, por vonë në mbrëmje të Premten priten zhvillime të fuqishme në veri të Italisë dhe mund të ndodhë edhe në disa pjesë të Sllovenisë.
Përderisa këto stuhi mjaft të fuqishme sidomos ditën e Premte do të vazhdojnë të shkaktojnë probleme mjaft të mëdha në Evropë, në viset tona do të vazhdojë stabiliteti i plotë anticiklonik dhe ajri shumë i nxehtë veror me origjinë nga Afrika veriore. Vranësirat te ne do të jenë krejtësisht të pakta, kurse ajo që do të mund të dallohet do të jetë rëra apo pluhuri që ka ardh në atmosferë nga shkretëtirat e Afrikes veriore.
Gjatë fundjavës vazhdon vapa e madhe verore, por lajmi i mirë është se (të dielën) do të ketë gjasa për destabilizim dhe freskim të paktën kalimtar të motit sidomos në disa zona të Republikës së Kosovës./MeteoBallkan
