Në shumë pjesë të Republikës së Kosovë pritet të kemi destabilizim të atmosferës sot pasdite dhe parashihen zhvillime të vranësirave “Cumulonimbus”, vranësira këto tipike për rrebeshe verore shiu. Në disa zona mund të ndodhë ndonjë shtrëngatë e fuqishme kalimtare me breshër dhe rrebeshe të dendura brenda një periudhe të shkurtër kohore.
Zonat më të rrezikuara janë pjesët qendrore, (Drenica, Obiliqi, Fushë Kosova) të Republikës së Kosovës ku mund të kemi zhvillim të ndonjë “Cumulonimbusi” i cili përqendrohet pak më gjatë në ato rajone, pastaj zhvillime me rrebeshe intensive mund të kemi edhe në verilindje, sidomos në rajonin e Gollakut dhe Llapit dhe në veri rajonet e Mitrovices dhe Vushtrisë, duke mos përjashtuar asesi pjesë të Dukagjinit dhe sidomos juglindjen e Republikës së Kosovës. Shtrëngata të izoluara mund të ndodhin edhe në disa vise tjera të Republikës.
Zhvillimet do të jenë të izoluara dhe disa rajone përfitojnë rrebeshe shumë intensive e disa tjera jo aq larg rrebeshe të pakta.
Të gjitha këto zhvillime janë krejtësisht normale për këtë periudhë kohore. Temperaturat e larta dhe ardhja e mases ajrore jo-stabile duke “ngacmuar” atmosferës dhe pasojnë pastaj zhvillimet vertikale që mund të prodhojnë breshër dhe bubullima të zhurmshme.
Në kohën e shtrëngates eventuale duhet të kemi kujdes deri të kalon dhe të qëndrojmë në ambiente të mbyllura mundësisht, por asesi nuk duhet të kemi frikë apo panik sepse të gjitha do jenë kalimtare. Çdo stuhi ka potencial për të shkaktuar disa dëme dhe nuk duhet të kemi fobi, megjithatë kujdesi duhet të jetë i shtuar deri në kalimin e stuhisë eventuale.
Stuhi kalimtare priten edhe në veri dhe lindje të Shqipërisë dhe pjesë të Maqedonisë së Veriut dhe Luginës së Preshevës.
Këto fenomene normale kanë ndodhur çdo vit dhe çdo herë dhe do të ndodhin prapë./MeteoBallkan
