Me 22 prill të çdo viti, qindra shtete përreth botës festojnë Ditën e Tokës duke mobilizuar qytetarët e tyre të ndihmojnë në mbrojtjen e planetit. Ky 22 prill është vit i veçantë, ngase njerëzimin e gjen në një situatë të pazakontë për shkak të pandemisë Covid-19, pa mundësinë e aktiviteteve që shënojnë këtë ditë sepse në shumë shtete të botës masat e izolimit janë obliguese.
Në Ditën e Tokës, njerëzit me kombësi dhe histori të ndryshme ngrisin zërin e tyre për planetin dhe kërkojnë mbrojtjen e tij, e kush mund të bëjë këtë më mirë sesa të rinjtë, e ardhmja jonë. Këto zëra do të dëgjohen tani edhe në Kosovë.
Kjo ditë synon të rrisë ndërgjegjësimin e mundësive për të përmirësuar efikasitetin e energjisë dhe shfrytëzimin e burimeve të ripërtëritshme të energjisë dhe mbrojtjen e mjedisit.
Dita e Tokës festohet çdo 22 prill në më shumë se 175 vende të botës dhe nga mbi 500 milionë njerëz. Kjo shifër renditet në ditën e tretë në botë për festimet. Dita e Tokës filloi të përkujtohet që nga viti 1970.
Zyrtarisht, OKB-ja e themeloi 22 prillin si Dita e Tokës dhe prillin si muaji i Tokës. Kjo ditë festohet në mbarë botën me një shumëllojshmëri aktivitetesh të tilla si pyllëzime, fushata të ndryshme, shfaqje, panaire, etj.
Dita e Tokës ka flamurin e vet, i cili është quajtur Flamuri Ekologjik. Flamuri është dizenjuar nga karikaturat e artistit Ron Cobb në vitin 1969 në dy ngjyra, i gjelbër dhe i bardhë.
E bardha nënkupton ajrin e pastër dhe e gjelbra tokën e gjelbër. Flamuri përmban gjithashtu Flamuri Ekologjikshkronjat “E” dhe “O”, që nënkuptojnë “mjedisin” (environment) dhe organizmin (organism).
Dita e Tokës është dita jonë, një ditë kur ne mendojmë për të gjitha mënyrat, që ne mund të kontribuojmë në ruajtjen e mjedisit; në parandalimin e shkatërrimit të Tokës, si dhe për të na kujtuar ndotjen e planetit.
Sigurisht, kjo ditë duhet të shënohet në mënyrë adekuate për të ndihmuar njerëzit të kuptojnë sesa i rëndësishëm është mjedisi dhe për të menduar “ekologjikisht”.
Për t’u kujdesur për planetin tonë, ne kemi nevojë për çdo orë e çdo ditë!
