Cikloni i shtresave të larta me qendër në Itali po vazhdon ndikimin e tij në Ballkan dhe Itali, ndërsa temperaturat nuk kanë pësuar ulje të madhe dhe kjo është pikërisht arsyeja e zhvillimit të stuhive të reja që priten sonte dhe dy ditët e ardhshme në Ballkan duke përfshirë edhe viset tona. Depërtimi i vazhdueshëm i ajrit të nxehtë nga Afrika veriore edhe në kuadër të masave ciklonike do të jetë sikur ti hedhësh benzinë zjarrit dhe kjo ndikon në fuqizimin e stuhive verore, megjithatë temperaturat do të shënojnë ulje sidomos me ardhjen e stuhive të mesjavës.
Të sqarojmë edhe njëherë nga se gjithnjë po hasim në keqkuptime. Stuhitë do të jenë të karakterit lokal dhe nuk kapin të gjitha territoret. Këto stuhi sado të fuqishme të jenë janë normale për këtë periudhë kohore. Nganjëherë mund të jenë shumë më të fuqishme se zakonisht, por ndodhin në pjesën më të nxehtë të vitit. Normalisht që shfaqjet ekstreme janë pak më të shpeshta kohëve të fundit megjithatë kanë ndodhur edhe më parë në periudha të caktuara.
Sidoqoftë, sot atmosfera do të destabilizohet edhe më fuqishëm në Ballkan. Në viset tona do të ketë destabilitete më të izoluara.
Stuhitë më të mëdha dhe potencialisht mjaft të rrezikshme sot priten përsëri në Bosnjë dhe Hercegovinë dhe Serbi, megjithatë ndonjë stuhi potencialisht e fuqishme mund të ndodhë edhe në ndonjë rajon tonin, por është jashtëzakonisht e vështirë të dihet saktësisht se ku do të ndodhë kjo.
Dy ditët e kaluara patëm stuhi shumë të fuqishme njëherë në Fushë Kosovë dhe Prishtinë (Të Dielen) e disa lokacione tjera, kurse të hënën u godit më së shumti Peja me rrethinë dhe Kamenica, Presheva, Bujanoci e Medvegja në Luginë, por edhe shumë vende në Maqedoninë Veriore, sidomos Kumanova.
Stuhi të izoluara presim edhe sot në viset tona, ndërsa sipas modeleve të Mërkurën edhe të Enjten presim stuhi edhe më të përhapura sidomos në viset tona. Destabilizim mjaft i fuqishëm i motit pritet edhe në Shqipëri me rrebeshe të rrëmbyeshme në veri të vendit.
Pra, vazhdon moti mjaft dinamik, me intervale të gjata me diell dhe periudha të gjata pa reshje, por gjithnjë me gjasa për zhvillime të ndonjë stuhie apo shtrëngate të fuqishme lokale me rrebeshe intensive, vetëtima e bubullima masive, erëra të fuqishme dhe breshër. Përmirësimi i motit pritet për vikend./MeteoBallkan
