Përgjatë Mesdheut, Detit Adriatik dhe Detit Jon po krijohen celula të masave ajrore ciklonike që shtrihen pastaj deri në Detin e Zi në lindje dhe ardhja e frontit të ftohtë me ajrin e ftohtë polar dhe kombinimi i lagështisë së Mesdheut dhe Atlantikut është kombinimi më perfekt për reshje bore edhe në territoret tona dhe kjo pritet të ndodhë këtë fundjavë.
Cikloni masiv në lindje të Evropes bashkohet me masat ciklonike në Mesdhe, ndërsa fronti i ftohtë vjen me reshje dhe pas tij vijnë masat e ftohta ajrore polare. Pas kalimit të frontit reshjet nuk ndërpriten ngase kemi masat ciklonike që lëvizin ngadal në drejtim të jugut dhe lindjes. Njëkohësisht në Evropë depërton masa gjigande ajrore anticiklonike e cila stabilizin motin në Kontinent.
Sidoqoftë reshjet e borës të premten fillojnë në Slloveni ku priten reshje të dendura bore.
Nga Sllovenia bora kalon menjëherë në Kroaci, pastaj në Bosnjë dhe Hercegovinë dhe Serbi. Në mbrëmje arrin në veri të Malit të Zi dhe pastaj në veri të Republikës së Kosovës. Gjatë natës së ardhshme reshjet e borës përfshijnë tërë territorin e Kosovës, pastaj veriun dhe verilindjen e Shqipërisë. Të shtunën reshje bore përfshijnë tërë territorin e Maqedonisë së Veriut, Luginës së Preshevës dhe Shqipërinë kontinentale. Në viset mesdhetare të Shqipërisë priten kryesisht reshje shiu, por mund të ndodh që në disa zona të depërtojë ajri i ftohtë polar dhe të ketë edhe reshje afatshkurtra bore ose fjolla bore.
Të shtunën në mbrëmje reshjet e borës pushojnë në veri të Kosovës së pari pastaj deri të dielën në mëngjes në tërë Kosovës priten intervale kohore me diell, ndërsa tutje kthjellimet përfshijnë edhe Shqipërinë dhe Maqedoninë Veriore, ndërsa sistemi i reshjeve kalon në Turqi, Gjeorgji dhe Rusinë jugore.
Reshjet e borës do të krijojnë shtresa në Kosovë dhe shumë pjesë të Shqipërisë dhe Maqedonisë së Veriut, ndërsa do të jenë të qëndrueshme disa ditë. Në fillim të javës së re temperaturat maksimale shënojnë rritje graduale dhe bora do të fillojë të shkrihet në disa zona, por kjo mbetet të shihet se në çfarë përmasash do të rriten temperaturat./MeteoBallkan
