Aurorat shumëngjyrëshe u paralajmëruan se mund të jenë të dukshme në shumë pjesë të Shteteve të Bashkuara si Alabama dhe Kalifornia Veriore – shumë më larg në jug sesa duken zakonisht – të enjten në mbrëmje për shkak të një shpërthimi të fuqishëm diellor dhe nxjerrjes masive koronale të lëshuar nga dielli, sipas Shërbimit Kombëtar të Motit.
Kjo pamje e jashtëzakonshme është rezultat i një stuhie të fuqishme diellore që goditi Tokën më 10 dhe 11 tetor.
Aurora krijohet kur grimcat diellore, të përshpejtuara nga një shpërthim i fuqishëm në Diell, ndërveprojnë me fushën magnetike të Tokës. Këto grimca, duke u përplasur me molekulat e oksigjenit dhe azotit në shtresat e sipërme të atmosferës, lëshojnë dritë me ngjyra të ndryshme – nga jeshile dhe e kuqe në vjollcë.
Normalisht, ky fenomen është i dukshëm në rajonet polare, por për shkak të intensitetit të stuhisë së nivelit G4, aurorat ishin gjithashtu të dukshme edhe në rajonin e Ballkanit.
Stuhia e fortë diellore, e klasifikuar fillimisht si niveli 4 në një shkallë nga 1 në 5, gjithashtu u tha se mund të prishë komunikimet, rrjetin elektrik dhe operacionet satelitore, sipas zyrtarëve.
Satelitët matin shpejtësinë dhe intensitetin magnetik të stuhisë, tha Shawn Dahl, koordinator i shërbimit për Qendrën e Parashikimit të Motit Hapësinor, në një konferencë shtypi të mërkurën.
Historikisht, stuhitë G4 janë të zakonshme gjatë një cikli diellor, por G5, ose stuhitë ekstreme gjeomagnetike si ajo që ndodhi më 10 maj, janë tepër të rralla, tha Dahl.
