Edhe ky Maj po vazhdon traditën e viteve të fundit kur patëm ditët më shumë vranësira e reshje të shpeshta gjatë këtij muaji. Maji i vitit 2022 ishte më i ngrohtë dhe më i thatë.
Ditët e mbetura të këtij muaji në Kosovë dhe Shqipëri do të karakterizohen me mot jo të qëndrueshëm, kurse rrebeshet lokale dhe vranësirat do të shtohen edhe në Shqipëri, pas disa ditëve kryesisht me diell.
Temperaturat do të shënojnë rritje të lehta në Kosovë, kurse në Shqipëri pritet të ndodhë e kundërta, pra ato do të pësojnë ulje të lehta dhe kjo për shkak të zgjerimit të rrebesheve të shiut në territorin shqiptar. Megjithatë, nuk do të mungojnë edhe orët e nxehta me rreze diellore. Rrebeshet apo shtrëngatat eventuale do të ndodhin më shumë orëve të vonshme të pasdites dhe orëve të natës.
Rrebeshet e shiut do të rigjenerohen edhe në Kosovë gjatë vikendit dhe ato pritet të jenë të karakterit lokal.Kësaj radhe gjasa për rrebeshe më intensive do të ketë rajoni i Dukagjinit.
Rrebeshe shiu pasditeve ditëve të ardhshme përpos Shqipërisë dhe Kosovë parashihen edhe në Maqedoninë Veriore, Luginë të Preshevës dhe Mal të Zi. Reshjet nuk do të jenë të balancuara. Dikund më shumë e dikund më pak.
Qershori me rritje të temperaturave.
Sipas ecurive aktuale sinoptike fillimi i Qershorit do të shënojë fuqizimin e një anticikloni mbi rajonin tonë dhe një përmirësim të paktën afatshkurtër të motit. Temperaturat do të shënojnë rritje të ndjeshme, kurse presim disa ditë pa rrebeshe shiu. Nga tani nuk mund të përcaktojmë saktë se sa ditë mund të kemi pa gjasa për rrebeshe shiu, por bazuar në ecuritë aktuale mund të jenë nga 3 deri në 5 ditë. Kjo mund të ndryshojë fare lehtë me afrimin e periudhës kohore për të cilën po flasim.
Pra, ditët e mbetura të Majit na pret mot i ndryshueshëm, me intervale të gjata kohore me diell, por edhe me paraqitje të shpeshta të vranësirave dhe rrebesheve lokale të shiut me vetëtima dhe bubullimë.
Fillimi i Qershorit me stabilizim të motit dhe rritje të temperaturave, por është e paqartë se sa do të zgjasë ky stabilizim i motit në fillim të Qershorit./MeteoBallkan
