Pas temperaturave pranverore dhe verore që kishim ditëve të kaluara sot kemi uljen e theksuar të temperaturave si pasojë e depërtimit të masave ajrore të ftohta nga veriu i Kontinentit. Gjatë natës në shumë rajone do të kemi kthjellim të motit dhe për këtë arsye mund të paraqiten edhe ngricat.
Të shpresojmë që vranësirat të “rezistojnë” deri në mëngjes dhe në këtë mënyrë nuk do të kishte ngrica fare, por nëse moti kthjellohet tërësisht gjatë natës atëherë temperaturat do të ulen deri në -3 gradë Celsius, kurse në viset malore ato mund të ulen deri në -5 ose – 6 gradë Celsius.
Të reshurat të cilat ishin paraparë në Kosovë “ikën” në drejtim të Bullgarisë, Maqedonisë së Veriut dhe Greqisë ku ka stuhi shiu dhe dëbore në viset kodrinore-malore. Reshje shiu dhe rrebeshe lokale ka edhe në lindje dhe juglindje të Shqipërisë, ndërsa në viset tjera është kryesisht thatë dhe ftohtë me erëra veriore, verilindore dhe lindore.
Lajmi i mirë është se nga nesër do të kemi stabilizim gradual të kushteve sinoptike, më shumë rreze diellore dhe ngritje graduale të temperaturave. Temperaturat do të shënojnë ngritje të theksuar në viset mesdhetare të rajonit tonë, kurse në viset kontinentale ngritja e temperaturave do të jetë më graduale sidomos nga pasnesër./Meteoballkan
Image by : Meteociel
