Vala e parë e nxehtësisë tropikale është intensifikuar sot në Ballkan e sidomos në viset tona dhe temperatura më e lartë sot është regjistruar në Maqedoninë Veriore në Shkup 34 gradë Celsius. Po ashtu edhe në Kosovë kemi temperatura deri në 31 Gradë Celsius, por normalisht nuk është kaq shumë nxehtë në të gjitha viset.
Temperaturat janë rritur shumë në zonat ku tradicionalisht është shumë nxehtë. Temperatura mbi 30 gradë Celsius sot kemi edhe në disa rajone të Shqipërisë dhe Malit të Zi.
Vala e nxehtësisë ka filluar vrullshëm dhe ditëve të ardhshme mund të fuqizohet edhe për disa shkallë.
Muaji Maj ishte mjaft i ftohtë me temperatura dukshëm nën vlerat mesatare për shumë ditë, por Qershori ka filluar ndryshe.
Sipas disa parashikimeve më të fundit vala e nxehtësisë do të vazhdojë deri me datën 10 Qershor, por në disa zona të izoluara mund të ndrërpritet shkurtimisht nga ndonjë stuhi e izoluar shiu e breshëri të Enjten pasdite, eventualisht edhe ndonjë pasdite apo mbrëmje tjetër, por shira më të përhapura nuk shihen në horizont dhe mund të kemi përkeqësim të gjendjes për shkak të mungesës së reshjeve apo thatësisë sidomos kur kemi para sysh temperaturat kaq të larta./MeteoBallkan
