Temperaturat e larta që kanë përfshirë Mbretërinë e Bashkuar kanë shkaktuar kaos në rrjetin hekurudhor, duke sjellë vonesa dhe anulime masive të udhëtimeve në Angli, Uells dhe Skoci. Mijëra pasagjerë mbetën të bllokuar në stacione dhe trena, pasi infrastruktura hekurudhore nuk mundi të përballojë valën e të nxehtit.
Ndërsa temperaturat atmosferike kalojnë 32°C, rrjeti hekurudhor ka pësuar kolaps, me autoritetet që detyrohen të ulin ndjeshëm shpejtësinë e trenave ose të ndërpresin lëvizjen për arsye sigurie. Reagimet nuk kanë munguar në rrjetet sociale, ku astronauti britanik Tim Peake ironizoi situatën duke shkruar: “Ndërtuam një stacion hapësinor që përballon temperatura nga +121°C deri në -157°C, por sistemi ynë hekurudhor dorëzohet në +30°C.”
Sipas kompanisë Network Rail, problemet shkaktohen nga zgjerimi i shinat prej çeliku në temperatura të larta.
Kur ato arrijnë mbi 46°C në sipërfaqe (rreth 30°C në ajër), shfaqen deformime të njohura si “buckling”, që rrezikojnë sigurinë. Përveç shinave, edhe sistemet e furnizimit me energji elektrike preken nga të nxehtit – telat e tensionit zgjerohen, varen më poshtë dhe mund të përplasen me pantografin e trenit, duke shkaktuar defekte të tjera dhe vonesa shtesë.
Edhe pse pjesë të rrjetit janë modernizuar, shumë pjesë të infrastrukturës mbeten të vjetruara dhe të ndjeshme ndaj kushteve ekstreme atmosferike.
Në të kaluarën, temperatura mbi 32°C në Britani ishin më të rralla. Tani po ndodh më shpesh dhe shkakton shqetësime shëndetësore dhe sociale.
Sipas shërbimit meteorologjik britanik (Met Office), ekziston tani një mundësi 50% që Britania të përjetojë përsëri temperatura mbi 40°C gjatë viteve të ardhshme.
