Një valë e re nxehtësisë tropikale është në horizont pas uljes së përkohshme të temperaturave të cilat gjatë kësaj fundjave nuk do të jenë të larta. E Freskët do të jetë dita e shtunë, me erëra të freskëta nga veriu, megjithatë pritet ditë me diell dhe temperaturat do të luhaten nga 25 deri në 27 gradë Celsius.
Në Shqipëri dukshëm më nxehtë sidomos në pjesët perëndimore të vendit.
Nga e diela (sidomos e hëna) temperaturat rriten menjëherë në Kosovë, (njëkohësisht shënojnë ulje të lehta afatshkurtra në Shqipëri) duke prekur shifrën 30 në Dukagjin dhe kjo shënon valën më të re të nxehtësisë tropikale dhe afrikane e cila do të intensifikohet gjatë javës së re.
Nga e Hëna temperaturat shënojnë rritje dhe dimensione të reja ngase kemi fillimin e depërtimit të masave ajrore të nxehta me origjinë nga Afrika veriore.
Sipas ecurive aktuale sinoptike kjo valë nxehtësie do të jetë intensive me temperatura që do të arrijnë dhe kalojnë mbi 35 gradë Celsius në Kosovë (afër fundjavës tjetër) dhe ndoshta 40 gradë Celsius në viset më të nxehta të Shqipërisë dhe Maqedonisë së Veriut.
Temperaturat do të shënojnë rritje progresive nga dita në ditë gjatë pothuajse tërë javës së re.
E ndikuar nga anticikloni i fuqishëm moti do të jetë i thatë, megjithatë nuk përjashtohen tërësisht disa mundësi për zhvillime të rrebesheve të izoluara kryesisht në disa zona kodrinore-malore gjatë mesit të javës, por këto rrebeshe nuk do të ndikojnë në uljen e temperaturave, përpos në ato zona të izoluara ku zhvillohen.
Temperaturat do të rriten ndjeshëm edhe në viset kodrinore-malore, prandaj priten ditë të vërteta verore dhe gjithashtu do të ketë rritje edhe të temperaturave minimale dhe për këtë arsye në shumë rajone edhe të Kosovës do të ketë natë tropikale që nënkupton se temperaturat nuk do të ulen nën 20 gradë Celsius, por kjo nuk mund të ndodhë në të gjitha rajonet.
Pra, këto janë disa detaje rreth zhvillimeve për motin për disa ditë të ardhshme duke përfshirë pjesën më të madhe të javës së re. Vala e re e nxehtësisë verore po vjen që është plotësisht normale sepse tani jemi edhe zyrtarisht në stinën më të nxehtë të vitit. Mundësi për ndryshime të vogla ka dhe sinqërisht shpresojmë të paktën të kemi ndonje rrebesh freskues shiu edhe pse gjasat tani për tani nuk janë aq premtuese. Deri atëherë shfrytëzoni këtë vikend apo fundjavë relativisht të freskët sidomos në zonat kontinentale./MeteoBallkan
