Reshje intensive bore kanë përfshirë shumë pjesë të Kosovës, sidomos viset kodrinore-malore me shtresa të cilat do të bëhen të mëdha me vazhdimin e reshjeve. Në viset më të ulëta vende-vende ka reshje bore, por pa shtresa sepse e kemi theksuar në postimet paraprake se ajri i ftohtë nuk do të jetë mjaftueshëm i fuqishëm për shtresa bore në të gjitha ultësirat, megjithatë kemi pamje fantastike nga shumë vende.
Fronti i ftohtë ka kaluar ndërsa në Detin Jon po krijohet cikloni i cili do të lëvizë ngadalë në drejtim të Greqisë. Sistemi i vranësirave të ciklonit do të jetë i mjaftueshëm për të sjellur reshje të reja të dendura bore në malet e Maqedonisë së Veriut, lindjes së Shqipërisë dhe Kosovës.
Reshjet do të ndërpriten përkohësisht sonte vonë pasdite ose në mbrëmje për të rifilluar prapë të Shtunën në mëngjes kur pritet të kemi episode të reja reshjesh të dendura bore. Përpos viseve malore reshje të dendura bore mund të ketë edhe në disa ultësira, madje mund të krijohen edhe shtresa, megjithatë reshjet e borës në ultësira në raste të caktuara do të mund të shndërrohen prapë në reshje shqote e shiu.
Reshje të dendura bore do të përfshijnë përsëri të shtunën viset kodrinore-malore të Kosovës dhe Maqedonisë së Veriut duke krijuar shtresa bore të cilat mund të arrijnë deri në 50 centimetra, madje në disa zona mund të shkojë deri në 55 apo 60 centimetra deri të Hënën.
Pra, pas një ndërprerje të reshjeve sonte, gjatë mëngjesit të së shtunës reshjet do të rifillojnë madje me shpeshherë me intensitet mesatar deri të lartë.
Apelohet për kujdes në të gjitha zonat malore të Kosovës, Maqedonisë së Veriut dhe lindjes së Shqipërisë./MeteoBallkan
