Fusha të fuqishme ajrore me presion të lartë atmosferik kanë përfshirë rajonin tonë duke kushtëzuar kthjellim të plotë të motit. Stabilizimi i tërësishëm i motit po pengohet vetëm nga erëra mesatare deri të fuqishme që po na vijnë nga verilindja dhe lindja e Kontinentit, megjithatë edhe këto erëra pritet të dobësohet gradualisht ditëve të ardhshme.
Po ashtu kemi edhe ngritje të lehta të temperaturave dhe këto temperatura janë në kuadër të mesatares për këtë periudhë kohore. Gjatë ditëve të ardhshme do të vazhdojmë të jemi nën ndikimin e masave të fuqishme anticiklonike që kanë përfshirë si Evropën po ashtu edhe Mesdheun dhe në këtë mënyrë është krijuar një bllokadë e fuqishme anticiklonike e cila nuk do të lejojë depërtimin e masave të lagshta ajrore nga Atlantiku në drejtim të rajonit tonë. Me një fjalë na pret mot mjaft i thatë ditëve të ardhshme.
Temperaturat do të shënojnë ngritje graduale çdo ditë e më shumë dhe në fundjavë na pret mot tërësisht stabil, i këndshëm dhe ngrohtë.
Reshjet e fillimit të këtij muaji zbutën pak thatësinë ekstreme dhe afatgjatë që kishte kapluar rajonin tonë dhe të shpresojmë që gjysma e dyte e këtij muaji të na sjellë reshje të reja atmosferike të cilat do të jenë aq të nevojshme për vegjetacionin dhe kulturat bujqësore./Meteoballkan
