Siç e kemi përmendur disa herë me radhë kjo javë do të jetë nën ndikimin e masave ajrore stabile dhe të thata anticiklonike të cilat për ne entuziastët e motit të ndryshueshëm janë ditët më monotone veçanërisht gjatë vjeshtës dhe dimrit, e kur kësaj i shtohet edhe thatësia ekstreme atëherë fjalët janë të tepërta.
Dominimi anticiklonik është plotësisht normal gjatë tërë stinëve të vitit herë pas here, por kur kjo ndodh në raste të mungesës së gjatë të reshjeve atmosferike atëherë bëhet problem, megjithatë kjo është atmosfera me dinamikat e saj herë të përshpejtuara e potente dhe nganjëherë me tendenca statike.
Në imazhin kompjuterik shihen anticiklonet që nga Azoret, pastaj Afrika verilindore, Evropa lindore e deri te anticikloni i fuqishëm siberik, ndërsa në Atlantik shumë afër Britanisë së Madhe shihet një ciklon jashtëzakonisht i fuqishëm.
Fushat anticiklonike pritet të fillojnë të dobësohen nga 21 Dhjetori dhe pastaj kemi gjasa në shpërbërjen e tërësishme të bllokadës anticiklonike nga 25 Dhjetori dhe kjo do të rezultonte me reshje atmosferike gjatë festave të fundvitit./Meteoballkan
