Një 18-vjeçar nga fshati Çinar i Lushnjës ka humbur jetën pas tërmetit 4.5 ballësh që goditi në orët e para të së dielës Shqipërinë.
Siç raportohet, 18 vjeçari është trembur në gjumë dhe pasi është ngritur me shpejtësi ka tentuar të largohet me vrap. Ai është rrëzuar në shkallët e katit të dytë të banesës.
18-vjeçari jetonte bashkë me prindërit. Sipas të njëjtave burime, i riu vuante nga probleme me ankthin, për çka edhe kurohej.
Trupi i pajetë i të riut është dërguar në morgun e spitalit të Lushnjës, ku pritet t’i ushtrohet një ekspertizë mjeko-ligjore.
Tërmeti me magnitudë 4.5 të shkallës Rihter u ndje në orën 00.17 të së dielës. Epiqendra e lëkundjeve ishte disa kilometra larg Lushnjës. Për pasojë tërmeti u ndje edhe në shumë qytete të tjera si Tiranë, Durrës, Kavajë, Fier, Korçë, Pogradec, Vlorë etj. /TvKlan
