Pas edhe disa ditëve mjaft të freskëta sidomos e Enjta dhe Premtja kur priten edhe rrebeshe shiu, para nesh është vala e parë potenciale e nxehtësisë verore e cila pritet të zgjasë disa ditë, por sipas disa parashikimeve më të fundit jo shumë gjatë.
Një valë nexhtësi duket në horizonet dhe vjen direkt nga Afrika veriore duke rritur temperaturat dukshëm mbi vlerat mesatare për këtë periudhë kohore, megjithatë kjo javë do të vazhdojë të na sjellë freski dhe rrebeshe shiu.
Fronti i së Enjtes do të sjellë ulje të mëtutjeshme të temperaturave dhe rrebeshe lokale shiu, vende-vende edhe me vetëtima dhe bubullimë.
Moti do të stabilizohet duke filluar nga dita e shtunë kur temperaturat do të rriten deri në 25 gradë Celsius, ndërsa e diela do të jetë edhe më stabile dhe më e ngrohtë.
Duke filluar me javën e re fillon edhe vala e nxehtësisë me potencial për temperatura deri në 30 gradë Celsius, madje edhe më shumë. Ka disa sinjale se temperaturat do të rriten deri në 33 apo 34 gradë Celsius, por kjo mbetet ende për tu parë.
Pra, pas shiut të së Enjtes dhe lokalisht edhe të Premtes do ti kemi disa ditë pa reshje atmosferike dhe me rritje të vazhdueshme të temperaturave, edhe pse mund të ndodhin rrebeshe të izoluara kryesisht disa viseve malore edhe gjatë valës së nxehtësisë.
Vera meteorologjike fillon me 1 Qershor dhe pikërisht atë ditë do të rriten temperaturat.
Sipas shumë modeleve vala e nxehtësis do të zgjasë deri me 6 Qershor kur pritet të ndërpritet nga rrebeshe shiu me vetëtima dhe bubullimë, por disa modele japin sinjale se ajo mund të zgjasë deri me 10 Qershor. Kjo mbetet të shihet më saktë gjatë ditëve të ardhshme. Disa ditë të paktën 5 apo 6 janë pothuajse të sigurta për nxehtësi verore dhe për më gjatë mbetet të ndiqet evoluimi i gjendjes sinoptike gjatë dekadës së parë të Qershorit./MeteoBallkan
