Reshjet të dendura bore pritet të fillojnë të dielën në pjesën më të madhe të Shqipërisë kontinentale, gati tërë Maqedoninë Veriore dhe shumë pjesë të Kosovës.
Është kjo një ndër episodet më serioze të dimrit të vërtetë pas shumë viteve dhe pas shumë dimrave shumë të butë të viteve të kaluara, megjithatë asgjë ekstreme.
Reshjet e borës kanë filluar vetëm në disa pjesë të Kosovës dhe do të vazhdojnë herë pas here edhe gjatë ditës së Shtunë, por pastaj pritet të pushojnë, ndërsa në Maqedoninë Veriore dhe Shqipëri ato pritet të fillojnë gjatë mëngjesit të hershëm të së dieles me afrimin e ciklonit të fuqishëm në drejtim të Detit Jon.
Njëkohësisht nga veriu i Kontinentit do të kemi ardhjen e një sasie solide të ajrit të ftohtë polar. Erërat veriore do të intensifikohen, shpeshherë të përcjellura me reshje bore të intensitetit të ndryshueshëm.
Reshjet më të dendura të borës këto ditë priten në veri- verilindje të Shqipërisë, veriperëndim të Maqedonisë së Veriut dhe jug të Kosovës, por edhe në shumë vise tjera priten reshje solide bore si në lindje dhe juglindje të Shqipërisë, pjesët tjera të Maqedonisë së Veriut e Kosovës si dhe në Luginë të Preshevës dhe Mal të Zi.
Depërtimi i ajrit të ftohtë polar do të jetë dukshëm më i thellë kësaj radhe, prandaj reshje bore priten edhe në disa qytete shumë afër bregdetit si në Shkodër, Lezhë, Ulqin etj, madje fjolla bore do të ketë edhe në vetë bregdetin shqiptar në veri të Shqipërisë dhe ndoshta edhe në jug të Malit të Zi.
Pothuajse e tërë Kosova do të mbulohet me petkun e bardhë dhe sipas shumicës së modeleve priten nga 10 deri në 30 cm. shtresë bore. Në malet e larta në jug të Kosovës edhe më shumë.
Shtresa të mëdha bore priten edhe në perëndim-veriperëndim të Maqedonisë së Veriut dhe veri-lindje deri në juglindje të Shqipërisë.
Pra, pas një kohë mjaft të gjatë më në fund do të mund të përjetojmë disa ditë të vërteta dimërore si në Kosovë, por ashtu edhe në Shqipëri dhe Maqedoninë Veriore. Ultësira Perëndimore e Shqipërisë vështirë që mund të ketë ndonjë “befasi”, por mund të ndodhë në ndonjë rajon në rast të përzierjes të ajrit të ftohtë polar./MeteoBallkan
