Një masë e fuqishme ajrore anticikonike është krijuar në Evropë dhe po vjen edhe në viset tona, edhe pse ende ndihet ndikimi ciklonik nga cikloni diku larg në Detin Egje. Ky ciklon po largohet dhe dobësohet, por në kuadër të tij do të ketë edhe një fluks të ajrit të ftohtë që vjen nga lindja e Everopes.
Për këtë arsye do të jetë ende mjaft ftohtë sidomos dy ditët e ardhshme, me rrymime të ftohta ajrore nga veriu dhe verilindja, ndërsa presim kthjellim gradual të motit acari i natës dhe mëngjesit do të forcohet.
Vranësirat do të jenë prezente edhe të Premten së bashku me intervale kohore me diell. Një sistem i dobët me reshje të dobëta bore mund të arrijë nga lindja dhe kjo është kjo. Nga ky sistem mund të ketë reshje të dobëta bore vetëm në disa rajone të Republikës së Kosovës dhe Maqedonisë së Veriut, duke mos përjashtuar edhe viset malore.
Nga e shtuna anticikloni kontinental do të marrë situatën tërësisht nën kontroll duke stabilizuar gradualisht kushtet sinoptike. Si pasojë do të shtohen ktjhellimet dhe acari i mëngjesit, por mund të ndodhë fenomeni i inverzionit të temperaturave. Kjo ndodhë nëse në lugina dhe disa ultësira krijohen mjegulla atëherë temperaturat e ulëta mbesin të ngujuara në ato vise të ulëta, ndërsa temperaturat ditore rriten në viset kodrinore-malore. Ky fenomen mund të ndodhë gjatë mbizotërimit anticiklonik ditëve të fundit të vitit, por jë në të gjitha viset.
Në fillim të javës së re masat ajrore pak më të ngrohta nga Mesdheu së bashku me masat e thata anticikonike depërtojnë duke rritur temperaturat. Acari do të zbutet dhe temperaturat ditore do të rriten. Vetëm mjegulla eventuale mund të jetë pengesë për rritjen e temperaturave në ato rajone ku eventualisht mund të ketë mjegull më të përqëndruar.
Përkeqësim gradual të motit sërish mund të kemi në ditët e para të vitit 2025, por jo krejt në fillim të vitit./MeteoBallkan
