Gjysma e parë e Prillit na ka “befasuar” me mot shumë të ngrohtë pranveror dhe veror dhe janë shumë interesante orët e shumta me diell të cilat i kemi përjetuar. “Befasia” më e madhe ishte për faktin se jemi mësuar që viteve të fundit të përjetojmë shumë ditë të ftohta këtë muaj dhe shumë pak ditë me diell, megjithatë ditët e ftohta do të vijnë edhe këtë vit, madje në viset malore do të kemi reshje të freskëta bore.
Ndryshimi i madh i motit do të filloi të martën me afrimin e sistemeve frontale nga veriperëndimi i Kontinentit, por edhe dita e martë në Kosovë do të jetë e ngrohtë. Temperaturat do të fillojnë të ulen dhe reshjet lokale do të fillojnë po ashtu.
Dita më e nxehtë e kësaj vale të nxehtësisë afrikane parashihet të jetë nesër apo dita e Hënë. Temperatura në Kosovë mund të “prekë” shifrën 30 gradë Celsius. që do të ishte ekstrem për muajin Prill.
Përndryshe në vende të ndryshme të Ballkanit temperatura do të arrijë dhe tejkalojë mbi 30 gradë Celsius duke përfshirë edhe Maqedoninë Veriore, Shqipërinë dhe Serbinë.
Nga e marta ulje graduale e temperaturave dhe kjo do të jetë hyrje në ndryshimin drastik të motit. Reshje të shpeshta atmosferike priten sidomos nga e mërkura. Në viset kodrinore-malore do të paraqiten edhe reshjet e borës./MeteoBallkan
