Ka shkuar në 158 numri i të vdekurve nga përmbytjet në Spanjë, derisa ekipet e shpëtimit po përpiqen me të gjitha forcat për të gjetur të mbijetuar.
Të enjten, më shumë se 1200 punëtorë, të ndihmuar nga dronët, u dërguan në një mision shpëtimi, shkruan BBC . El Pais raporton se ushtria po arrin edhe në Valencia.
“Gjëja më e rëndësishme tani është të shpëtojmë sa më shumë jetë të jetë e mundur,” u tha kryeministri Pedro Sánchez viktimave gjatë një vizite në rajonin e prekur.
Megjithatë, ndihma nuk kishte arritur ende në disa nga vendet e prekura, kështu që njerëzit po i nxirrnin vetë trupat e të vdekurve nga balta dhe rrënojat.
Të paktën 155 vdekje u raportuan në Valencia, ndërsa dy të tjerë u raportuan në Castilla-La Mancha në perëndim të provincës dhe një tjetër, shtetas britanik, vdiq në Andaluzi.
Të paktën 40 vdekje janë raportuar deri më tani në qytetin Paiporta në Valencia, ku lumi ka dalë nga brigjet e tij.
“Ne të gjithë njohim dikë që ka vdekur. Ky është një makth,” tha farmacisti Miguel Guerrilla , duke qëndruar para farmacisë së tij të mbuluar me baltë të dendur.
Të enjten, varrmihësit morën trupat e të vdekurve nga rruga me autovetura, ndërsa në rrugët aty pranë, makinat e dëmtuara nga përmbytja qëndronin njëra mbi tjetrën.
Motoristët treguan për tmerrin e tyre kur u bllokuan nga përmbytjet e shpejta që i kthyen autostradat dhe rrugët në lumenj të martën. Shumë mbijetuan duke u ngjitur në pemë ose ura për të shpëtuar.
Zyrtarët nuk zbuluan numrin e personave ende të zhdukur, por thanë se kishte shumë, pasi numri i të vdekurve u rrit me 60 të tjerë të enjten.
Më shumë se 90 vdekje u raportuan vetëm të mërkurën si pasojë e menjëhershme e shirave të rrëmbyeshëm dhe përmbytjeve, të cilat prekën kryesisht Valencia-n, si dhe Castilla-La Mancha dhe deri në Malaga në Spanjën jugore.
Shirat e rinj po vijnë
Sipas agjencisë meteorologjike spanjolle Aemet, në qytetin Chiva pranë Valencias, sasia e reshjeve e barabartë me sasinë vjetore të reshjeve ra në vetëm tetë orë.
Ndërsa paralajmërimet e mëtejshme për shiun u lëshuan për jugun dhe lindjen e vendit të enjten, Mbreti Felipe VI paralajmëroi se gjendja e jashtëzakonshme ‘nuk kishte përfunduar ende’ dhe kryeministri Sánchez paralajmëroi qytetarët të strehoheshin.
Ndërkohë, në zonat e goditura nga përmbytjet, qindra janë strehuar në strehim të përkohshëm ndërsa fillon detyra e ngadaltë dhe e mundimshme e pastrimit të rrugëve dhe riparimit të shtëpive dhe bizneseve.
Shumë rrugë dhe rrjeti hekurudhor që lidh Valencia-n me pjesën tjetër të Spanjës mbeten të ndërprera.
Spanja filloi një periudhë zyrtare zie kombëtare tre-ditore të enjten, me flamuj në ndërtesat qeveritare të valëvitur në gjysmë shtizë dhe minuta heshtje.
Zemërimi po rritet tek publiku sepse një vend i zhvilluar europian nuk i paralajmëroi qytetarët e tij me kohë për rrezikun e përmbytjeve.
Pyetjet po ngrihen nëse agjencitë e menaxhimit të fatkeqësive lëshuan paralajmërime shumë vonë.
Një alarm i parë i kuq u lëshua në orën 7 të mëngjesit të së martës nga autoriteti kombëtar i motit (Aemet).
Por vetëm 11 orë më vonë, pikërisht në orën 20.03, kur tashmë e gjithë zona ishte përfshirë nga përmbytjet, në celularët e banorëve mbërriti ftesa urgjente e mbrojtjes civile për të mos lëvizur në të gjithë krahinën
Agjencia e Mbrojtjes Civile, e vendosur gjatë fatkeqësive kombëtare, nuk lëshoi një paralajmërim deri në orën 20:03 me orën lokale të së martës mbrëma, kohë në të cilën disa vende në Valencia ishin përmbytur për orë të tëra.
Autoritetet thanë se rajoni u godit nga rrebeshe dhe i quajtën përmbytjet “të paprecedentë”.
Shumë faktorë kontribuojnë në përmbytjet, por ngrohja atmosferike e shkaktuar nga ndryshimet klimatike i bën më të mundshme reshjet ekstreme.
Meteorologët thanë se shkaku kryesor i shiut intensiv është ndoshta fenomeni ‘gota fria’ – një ngjarje natyrore e motit që prek Spanjën në vjeshtë dhe dimër kur ajri i ftohtë zbret në ujërat më të ngrohta mbi Mesdhe.
Megjithatë, rritja e temperaturave globale ka bërë që retë të sjellin më shumë shi, thonë shkencëtarët.
Numri i të vdekurve është përmbytjet më të rënda të Spanjës që nga viti 1973, kur të paktën 150 njerëz vlerësohet të kenë vdekur në provincat juglindore të Granadës, Murcias dhe Almerias.
