Erërat e fuqishme që kanë përfshirë mbrëmë regjione të ndryshme të Zvicrës, në disa raste kanë shkaktuar dëme të konsiderueshme materiale. Kështu, në Birsfelden të Kantonit Baselland era ka rrëzuar një vinç të madh ure, të rëndë 400 tonelata, shkruan srf.ch.
Ndonëse, sipas policisë, nuk ka pasur asnjë të lënduar, dëmi material i shkaktuar me këtë rast, është i konsiderueshëm.
Zona ku ka ndodhur aksidenti është bllokuar, pasi që duhet të testohet statika e vinçit.
Në përgjithësi, sipas Policisë së Kantonit Basel-Landschaft, në zonën që ajo mbulon, janë paraqitur 188 njoftime për dëme të shkaktuara nga era.
Në komunat si: Muttenz, Birsfelden dhe Münchenstein ka pasur edhe rrëzime të tjegullave nga çatitë e shtëpive ndërsa janë regjistruar edhe shtëpi me bodrume të vërshuara nga uji si dhe drurë që, nga fuqia e erës, janë rrëzuar mbi makina.
