Kjo javë parashihet të jetë e ndryshueshme sa iu përket kushteve sinoptike dhe kjo për shkak të frontit të ftohtë ajror i cili parashihet të vije të mërkurën pasdite dhe në mbrëmje i cili do ti jap fund valës më të fuqishme të nxehtësisë në rajonin tonë këtë verë.
Dy ditët e para të javës parashihen të jenë shumë të nxehta me temperatura maksimale rreth 40 gradë celsius në nivel rajonal. Të martën do të jetë kulminacioni i nxehtësisë, por njëkohësisht presioni i ajrit do të fillojë të ulet dhe kjo është një shenjë që përkeqësimi i motit nuk është larg.
Të mërkurën pasdite pra pritet përkeqësim i motit, priten shtrëngata lokale me shi dhe bubullimë si dhe erëra vende-vende të fuqishme kalimtare kryesisht në Kosovë veri, lindje dhe qendër të Shqipërisë, Mal të Zi dhe shumë të Maqedonisë së Veriut. Rrebeshe shiu me vetëtima dhe bubullimë të mërkurën mund të ketë edhe në bregdetin malazez dhe veri të Bregdetit Shqiptar.
Të enjtën priten ulje të temperaturave në tërë rajonin, ndoshta me përjashtim të perëndimit dhe jugut të Shqipërisë ku uljet e temperaturave do të jenë më të lehta. Pritet stabilizim gradual i motit por përpos intervaleve kohore me diell do të ketë edhe vranësira sidomos në Kosovë.
Të premtën në tërë rajonin pritet mot relativisht i nxehtë, me mundësi për rrebeshe të izoluara shiu me vetëtima dhe bubullimë, kryesisht në viset kodrinore-malore, ndërsa në fundjavë priten ngritje të sërishme të temperaturave dhe mot kryesisht stabil dhe me diell.
Për çdo ndryshim eventual do të njoftoheni në postimet tona të përditshme./Meteoballkan
