Java që kemi hyrë do të karakterizohet me mot të nxehtë, megjithatë nuk do të jetë tërësisht stabile sidomos fillimi i javës ku në disa rajone priten rrebeshe shiu me vetëtima dhe bubullimë. Pra , e kemi fjalën për të hënën dhe të martën kur pritet që pasdite të ketë destabilizim të pjesshëm të motit me rrebeshe lokale, freski vende-vende, por duhet theksuar se shumë rajone do të mbesin pa reshje atmosferike për arsye se ende nuk kemi ndonjë ciklon i cili do të zbuste thatësirën e madhe në tërë rajonin tonë.
Nga e mërkura pritet që masa ajrore jostabile të dobësohet dhe përsëri do të kemi fuqizimin e masave ajrore të thata anticiklonike mbi rajon dhe kjo nënkupton rrallimin e rrebesheve të shiut ku do të dominojnë rrezet e diellit dhe temperaturat e larta por nuk pritet nxehtësi ekstreme.
Mot kryesisht stabil, mjaft i nxehtë dhe i thatë do të vazhdojë në pjesën e dytë të javës në rajonin tonë ku nuk përjashtohet mundësia që të ketë rrebeshe të izoluara shiu me vetëtima dhe bubullimë të cilat nuk do të ndikojnë aq në zbutjen e thatësirës dhe nxehtësisë.
Informacione tjera në postimet tona të përditshme në meteoballkan./Meteoballkan
