Fronti i ftohtë direkt nga veriu ka përfshirë pjesën më të madhe të Ballkanit perëndimore dhe verior, duke kushtëzuar ulje të ndjeshme të temperaturave.
Fronti me shumë vranësira dhe vende-vende edhe me reshje kalimtare shiu ka përfshirë Bosnën, Serbinë dhe veriun e Malit të Zi, ndërsa vranësirat i janë afruar edhe Kosovës siç mund të shihen edhe imazhin satelitor.
Kosova ka filluar të ndjejë uljet e ndjeshme të temperaturave si dhe në këto çaste në veri të vendit ka edhe shtim të vranësirave. Gjatë mbrëmjes, natës dhe nesër priten edhe reshje lokale të herëpashershme shiu.
Në pjesën më të madhe të Shqipërisë dhe në jug të Malit të Zi fronti do të depërtojë gradualisht deri nesër paradite duke kushtëzuar edhe rrebeshe lokalisht të fuqishme shiu me vetëtima dhe bubullimë dhe ulje të ndjeshme të temperaturave.
Në viset më të larta malore në Kosovë, Mal të Zi dhe veri të Shqipërisë ka gjasa që të ketë edhe fjolla bore./Meteoballkan
