Fronti i ftohtë ajror i cili shkaktoi uljen e temperaturave tek ne tani është duke shkaktuar reshje intensive në Bullgari, Greqi dhe disa pjesë të Shqipërisë dhe Maqedonisë së Veriut. Ky ciklon dhe fronti i ftohtë në kuadër të tij do të rrugëtojë tutje në drejtim të Turqisë dhe Lindjes së Afërt dhe të Mesme, ndërkohe tek ne do të fillojnë të depërtojnë masa pak më të ngrohta dhe njëkohësisht të thata anticiklonike.
Në anën tjetër në Evropë kemi dominimin e masave ajrore të thata anticiklonike dhe këto masa do të përfshijnë edhe rajonin tonë. Përjashtim bëjnë Gadishulli Iberik i cili do të përfshihet nga stuhi të fuqishme shiu dhe dëbore ditëve të ardhshme pasi që temperaturat kulmuan ditëve të shkuara dhe arritën deri në 30 gradë Celsius. Reshje atmosferike ditëve të ardhshme priten edhe në Skandinavi dhe pjesërisht edhe në Britaninë e Madhe dhe Francë. Shumë pjesë tjera të Evropës perëndimore dhe qendrore do ti kenë disa ditë stabile, por jo për shumë kohë.
Pra, ditëve të ardhshme rajoni ynë dhe shumica e territorit të Evropës qendrore, pjesërisht edhe perëndimore do të dominohen nga temperatura relativisht të larta pranverore, kurse Gadishulli Iberik do të dominohet nga temperatura dimërore dhe reshje të mëdha bore./Meteoballkan
Image by : severe weather europe
