Një masë ajrore mjaft jo stabile dhe e freskët ka përfshirë Gadishullin Ballkanik. Ne ende gjendemi në “sektorin e nxehtë” të masave ajrore ciklonike para-frontale të cilat po shkaktojnë reshje të dendura shiu në Bosnjë dhe Hercegovinë dhe pjesë të Serbisë. Fronti i ftohtë në kuadër të këtij cikloni ka arritur në Bosnjë dhe Serbi dhe duke përparuar në drejtim të jugut dhe juglindjes. Në Kosovë pritet të arrijë në orët e pasdites së vonshme ose mbrëmjes.
Priten ulje të ndjeshme të temperaturave, shtim i vranësirave dhe vende-vende edhe reshje dhe rrebeshe shiu me vetëtima dhe bubullimë. Në disa rajone mund të ketë rrebeshe intensive shiu, por shumë më pak krahasuar me reshjet e fuqishme të cilat pritet të përfshijnë Bosnjën, Serbinë, veriun e Greqisë, disa pjesë të Maqedonisë së Veriut, Bullgarisë, Rumanisë etj.
Fronti i ftohtë gjatë natës dhe nesër do të përfshijë edhe Shqipërinë dhe Maqedoninë e Veriut, por në shumë rajone të Shqipërisë do të ndjehet fare pak. Priten reshje dhe rrebeshe kalimtare lokale shiu me vetëtima dhe bubullimë, por reshjet nuk do të jenë gjithëpërfshirëse.
Dita e nesërme (e shtunë) në Kosovë më shumë do ti përngjajë vjeshtës së sa verës, me vranësira të cilat do të sjellin reshje të herëpashershme dhe lokale shiu të cilat do të jenë jashtëzakonisht të mirëseardhura, por të shpresojmë që të jenë sa më përfshirëse sepse mund të ndodhë përsëri që disa rajone të mos preken nga reshjet aq shumë të kërkuara. Reshje më intensive mund të ketë në juglindje të Kosovës. Fronti dhe vranësirat do të përfshijnë edhe Shqipërinë, por të cilat do të jenë kalimtare dhe nuk priten reshje në tërë territorin.
Rrebeshe të fuqishme apo intensive shiu me vetëtima dhe bubullimë nesër mund të ketë në shumë pjesë të Maqedonisë së Veriut ku mund të ketë edhe vërshime të shpejta afatshkurtra.
Mot me intervale kohore me diell dhe vranësira të cilat në disa rajone do të kushtëzojnë edhe rrebeshe shiu me vetëtima dhe bubullimë do të mbajë edhe të dielën, kurse nga e hëna pritet përmirësim i motit dhe ngritje e temperaturave./Meteoballkan
