Edhe pse një front i fuqishëm i ftohtë ajror do të depërtojë në lindje të Evropes anticikloni mesdhetar nuk do të lejojë që kjo fundjavë të ketë ndonjë destabilizim të fuqishëm të motit në viset tona, përkundrazi pritet mot plotësisht stabil dhe me rritje të ndjeshme të temperaturave.
Anticikloni masiv që shtrihet që nga Atlantiku dhe Britania e Madhe do të ndikojë edhe në Mesdhe dhe viset tona nga Evropa qendrore, ndërsa cikloni me masa të ftohta ajrore do të depërtojë thellë në lindje të Evropës dhe Rusi.
Si rrjedhojë e gjendjes sinoptike në drejtim të viseve tona do të depërtojnë masa të ngrohta ajrore me origjinë nga Mesdheu dhe Afrika veriore.
Vranësirat do të jenë të pakta dhe të karakterit lokal pa ndonjë ndikim në prishjen e atmosferës së ditëve stabile.
Përkeqësim të motit mund të kemi krejt në fund të këtij muaji dhe fillim të muajit Maj.
Disa versione japin një depërtim masiv të ajrit të ftohtë nga verilindja e Evropës me rezultat uljen e fuqishme të temperaturave dhe reshje të shpeshta shiu e në viset kodrinore-malore priten reshje bore. E kemi fjalën për fillimin e muajit Maj, megjithatë ky parashikim ende nuk mund të merret si përfundimtar, ngase gjërat mund të ndryshojnë.
Sipas modeleve nga tani kemi dy versione dhe versioni i ftohtë nga tani duket më i besueshëm, por ka edhe një version që gjatë fillimit të Majit të kemi mot jo stabil me mundësi për stuhi lokale shiu me vetëtima dhe bubullimë. Versioni dytë do të mbante temperaturat e larta dhe reshjet do të ishin të karakterit lokal.
Nga tani modelet më shumë përkrahin versionin e parë, pra një fillim-Maji mjaft të ftohtë dhe me reshje shiu e bore në viset kodrinore-malore. E përsërisim prapë se gjërat mund të ndryshojnë për arsye se kjo është vetëm një analizë paraprake e trendit të modeleve.
Pra për fund disa ditë që po vinë presim mot mjaft të mirë dhe të këndshëm pranveror, madje në disa zona edhe veror. Ndryshim të motit do të kemi në fund të Prillit dhe fillim të Majit, por për fuqinë dhe dimensionet e ndryshimit të motit që pritet javë tjetër duhet të presim sepse ende asgjë nuk është përfundimtare edhe pse parashikimet për një fillim-maj ndjeshëm më të ftohtë tani për tani janë më të besueshme./MeteoBallkan
