Java e fundit e Nëntorit nuk do të ndryshojë shumë në aspektin meteorologjik nga pjesa tjetër e këtij muaji që kaloi duke u regjistruar një ndër Nëntorët më të thatë të viteve të fundit. Po thuajse është bërë trend që viteve të fundit të kemi mot të mirë në fund të vjeshtës dhe fillim të dimrit meteorologjik që fillon me 1 Dhjetor. Dimri astronomik ose kalendarik fillon me 21 Dhjetor.
Gjatë kësaj jave na pret mot i ngjashëm po thuajse gjatë tërë javës. Mëngjeset do të jenë të ftohta, me ngrica të dobëta dhe mjegull. Për shkak të dominimit të fuqishëm anticiklonik nëpër shumë lugina herë pas here do të kemi mjegull e cila mund të qëndrojë gjatë tërë ditës. Kjo ndodh kur atmosfera është statike, pra jo dinamike. Ajri i ftohtë është më i rëndë dhe i dendur dhe zbret poshtë deri në sipërfaqen e tokës duke u kondensuar, ndërsa ajri i nxehtë ngritet në shtresa më të larta atmosferike. Për këtë arsye në viset kodrinore-malore do të ketë më shumë rreze diellore, ndërsa nëpër disa qytete dhe lugina do të ketë mjegull. Kjo gjendje sinoptike nuk është e pazakontë për muajt e vjeshtës së vonshme dhe dimrit, kur presioni i ajrit është i lartë dmth. kur jemi nën ndikimin e masave ajrore anticiklonike.
Pra edhe një herë në tërë rajonin gjatë kësaj jave do të kemi alternime mes vranësirave kalimtare, rrezeve diellore dhe mjegullës ose vranësirave të ulëta. Nëpër shumë rajone mesdita do të jetë e nxehtë dhe mjaft e këndshme ,e përjashtim të atyre rajoneve ku eventualisht do të qëndrojë mjegulla. Temperaturat minimale (gjatë netëve dhe mëngjeseve të ftohta) mund të ulën deri në -4 ose -5 gradë Celsius, ndërsa ato maksimale mund të arrijnë deri në 15 gradë Celsius dhe kjo vlen kryesisht për Kosovë, kurse në disa vise të Shqipërisë dhe Maqedonisë së Veriut ajo maksimale mund të arrijë deri në 20 gradë Celsius.
Për fundjavë gjendja sinoptike do të fillojë të ndryshojë gradualisht. Fillimisht në Gadishullin Iberik do të kemi uljen e presionit atmosferik, pra një ciklon me përmasa të mëdha i cili gradualisht do fillojë të rrugëtojë në drejtim të Italisë dhe pastaj eventualisht edhe në drejtim të Gadishullit Ballkanik duke sjellur edhe reshje lokale shiu./Meteoballkan
