Temperaturat ulën menjëherë në fillim të javës duke u shoqëruar edhe me reshje shiu, erëra veriore si dhe në shumë vende edhe reshje bore.
Gjatë kësaj jave do të jemi nën ndikimin konstant të masave të ftohta ajrore me origjinë polare të cilat nuk të të lejojnë që dimri të ikë aq lehtë nga rajoni ynë. Cikloni i fuqishëm i cili sonte dhe nesër kalon përmes territoreve tona do të rrugëtojë në drejtim të Bullgarisë, Detit të Zi dhe Ukrainës. Aniticikloni i fuqishëm i Azoreve do të bëjë ekspansion të madh në drejtim të Atlantikut afër Britanisë së Madhe dhe mes këtyre dy masave gjigande ajrore krijohet korridori i cili nga veriu dhe verilindja dërgon ajrin e ftohtë direkt në drejtim të rajonit tonë.
Gjatë ditës së nesërme (e hënë) reshjet do të jenë më të theksuara në tërë rajonin tonë, kurse gjatë ditëve të javës ajri i ftohtë mbetet, por do të kemi edhe intervale kohore me diell dhe pa reshje. Gjatë javës do të kemi erëra të ftohta veriore. Vende-vende, herë pas here priten reshje kryesisht dëbore sidomos në viset kodrinore-malore, por nuk priten reshje të mëdha. Nëpër ultësira mund të ketë reshje afatshkurtra sporadike shiu.
Afër fundjavës në Mesdheun qendror do të kemi krijimin e një super-cikloni, ose një mase gjigande ajrore me presion të ulët atmosferik. Rrugëtimi i saktë i këtij cikloni të fuqishëm do të jetë përcaktues nëse do të kemi reshje të dendura shiu ose bore. Nëse cikloni shkon drejt jugut të Italisë dhe Greqisë atëherë në viset tona pritet të kemi reshje të dendura bore, por nëse cikloni hynë në Adriatikun qendror (pak modele simulojnë këtë opcion, megjithatë mbetet opcion) atëherë në drejtim të rajonit tonë priten ngritje të temperaturave dhe reshje të dendura shiu. Opcioni i parë është shumë më i besueshëm dhe më i mundshëm, megjithatë gjatë javës do të jemi duke e përcjellur evoluimin e gjendjes sinoptike dhe do tju njoftojmë për të rejat më të fundit sinoptike./Meteoballkan
