Për shkak të dinamikës së atmosferës, rritjes së temperaturave dhe afrimit të frontit të ftohtë ajror nga veriu sot gjatë ditës dhe pasdite pritet destabilizim i motit në Kosovë, por jo në tërë territorin.
Përpos reshjeve lokale të shiut në disa rajone sot priten edhe rrebeshe shiu me vetëtima, bubullimë dhe gjithsesi ka gjasa për breshër të imët.
Është shumë e vështirë për të mos thënë e pamundur ta dimë saktësisht se ku do të ketë breshër e ku jo, por reshjet e sotme pritet të jenë të karakterit lokal.
Pas disa ditëve pranverore po hymë në një periudhë me mot mjaft të paqëndrueshëm ku fillimisht pritet të kemi rrebeshe lokale shiu, ndonjë vetëtimë dhe bubullimë, mundësi edhe për breshër të imët, pastaj reshje shiu, vende-vende intensive, reshje bore fillimisht në viset kodrinore-malore pastaj edhe në disa vise më të ulëta në Kosovë (jo në tërë territorin).
Pas qetësimit të reshjeve lokale gjatë natës dhe nesër paradite, nesër pasdite në Kosovë dhe gati krejt rajonin priten reshje të reja, vende-vende intensive atmosferike. Reshjet më të dendura priten në veri të Shqipërisë deri në qendër, jug të Malit të Zi dhe pastaj disa vise në Kosovë, ndërsa më te paktat në jug dhe juglindje të Shqipërisë. Nuk pritet ndonjë ekstrem./Meteoballkan
