Moti sot është stabilizuar, edhe pse ende është freskët për këtë periudhë kohore për shkak prezencës së masave të freskëta ajrore nga veriperëndimi i Evropës. Reshjet e shiut kanë pushuar në tërë rajonin dhe na presin disa ditë pa reshje për arsye të depërtimit të mases ajrore të thatë anticiklonike.
Pyetja e cila po na drejtohet nga shumë lexues të cilët me të drejtë janë të shqetësuar për kulturat e tyre bujqësore e sidomos për kositjen e barit se sa ditë nuk do të kemi reshje do të mundohemi ti përgjigjemi.
Pra, këto ditë nuk pritet të kemi shi dhe njëkohësisht nuk pritet as nxehtësi e madhe. Temperaturat maksimale pritet të luhaten nga 24 deri në 27 gradë Celsius në Kosovë, ndërsa në Shqipëri dhe Maqedoninë Veriore ndonjë gradë më lartë. Reshje atmosferike nuk priten deri të dielën pasdite.
Të dielën pasdite vonë në Kosovë pritet destabilizim i pjesërishëm i atmosferës ku vende-vende do të ketë zhvillime të vranësirave vertikale të cilat pritet të kushtëzojnë rrebeshe të izoluara shiu me vetëtima dhe bubullimë.
Nga e hëna do të vijojë destabilizimi edhe më i fuqishëm dhe më i përhapur i atmosferës. Në shumicën e rajonit priten rrebeshe lokale shiu me vetëtima dhe bubullimë dhe mundësi edhe për breshër. Pra, kjo është përgjigja dhe parashikimi bazuar në ecuritë e sotme sinoptike, ndërkohë llogaritë mund ti bëni vetë sepse për ne kjo është një përgjegjësi e madhe.
Nga sot deri të dielën pasdite pa reshje. Të dielën pasdite vonë rrebeshe lokale me vetëtima dhe bubullimë, ndërsa nga e hëna me rrebeshe të shpeshta dhe më të përhapura./Meteoballkan