Nesër në Kosovë pritet të mbajë mot kryesisht me diell dhe shumë i nxehtë. Temperaturat maksimale pritet të luhaten nga 34 deri në 37 gradë Celsius. Pasdite rrallë në disa rajone mund të ketë ndonjë rrebesh të izoluar shiu me vetëtima dhe bubullimë.
Në Shqipëri dhe tërë rajonin tonë nesër pritet të mbajë mot kryesisht me diell dhe shumë i nxehtë, me temperatura maksimale rreth 39- 40 gradë Celsius në nivel rajoni.
Të mërkurën pritet të mbajë mot paradite me diell por me ulje të lehta të temperaturave për shkak të një fronti të dobët të ftohtë ajror. Pasdite priten zhvillime të vranësirave vertikale të cilat pritet të kushtëzojnë rrebeshe lokale shiu me vetëtima dhe bubullimë. Vende-vende mund të ketë ndonjë rrebesh të fuqishëm me breshër, por reshjet nuk pritet të kapin tërë territorin e Kosovës. Rrebeshe të pasditeve të mërkurën pritet të ketë edhe në veri të Malit të Zi, verilindje dhe lindje të Shqipërisë dhe shumë vise në Maqedoninë e Veriut, megjithatë reshjet do të jenë të karakterit të izoluar. Në viset tjera pritet mot i nxehtë dhe me diell.
Nga e enjta na pret mot me diell, por jo ekstremisht i nxehtë. Në Shqipëri do të vazhdojë të jetë më së nxehti./Meteoballkan