Dy modelet më të sakta numerike globale për parashikim të motit kanë ngjashmëri por edhe dallime në daljet e sontme të analizave meteorologjike për goditjen e parë dimërore këtë sezonë. Përderisa shumë portale japin lajme senzacionale dhe dihet që qëllimi i tyre është vetëm për klikime, ne do të jemi më të rezervuar në këtë drejtim.
Modeli GFS me datën 19 nëntor jep reshje bore në tërë territorin e Republikës së Kosovës, në perëndim të Maqedonisë dhe lindje të Shqipërisë. Sipas këtij modeli goditja dimërore do të jetë e fuqishme dhe se do të krijohen edhe shtresa bore deri në 10 cm. Temperaturat do të jenë mjaft të ulëta dhe ato minimalet mund të shkojnë deri në minus 8 e ndoshta edhe minus 10 gradë celsius.
Në anën tjetër modeli ECMWF i cili sipas nesh është modeli më i saktë në botë jep një version më të butë dhe reshje më të pakta bore dhe me temperatura deri në minus 5 apo minus 8 gradë celsius. Sidoqoftë modelet kanë ende “punë për të bërë” dhe ne do të jemi këtu duke i analizuar të dhënat dhe gjithsesi do tju informojmë me kohë kur rezultatet do të jenë “unanime”.
Një fakt është i sigurt e kjo është goditja e parë dimërore e cila assesi nuk do të jetë ekstreme por duhet pritur edhe pak ditë në mënyrë që të jemi të sigurtë dhe tju japim informacione sa më të sakta./Meteoballkan.
